12 студзеня 2019 года дзверы музея расчыніліся для ўсіх жадаючых даведацца пра цікавыя, крышку магічныя традыцыі святкавання Калядных вечароў. У выставачнай зале, абсталяванай як вясковая хата, адбылося фальклорнае свята “У калядны вечар”. На свята завіталі амаль што 20 гледачоў. Свята Каляды багата рознымі традыцыямі, таму калядная сустрэча распачалася з гаворкі аб традыцыях каляднай вячэры. Яе вялі Дзед, Бабуля і Ўнучка. Яны прыбралі па-святочнаму стол і падрыхтавалі 12 страў, запалілі свечку, абвязалі ножкі стала, каб сям’я крапчэйшай была, паклікалі Мароза куццю есці, як гэта рабілі нашыя продкі. Не абышлося на свяце без калядоўшчыкаў. З добрай каляднай песняй завітаў гурт ражаных: Каза, Пеўнік, Бусел, Зорканоша. Галоўнай ў гурце, была Каза. Беларусы заўсёды лічылі яе сімвалам багацця і дабрабыту, таму трэба было добра адарыць Казу, каб наступны год быў шчаслівам і багатым. Калі гаспадары пачаставалі яе рознымі прысмакамі, Козачка весела гуляла з гледачамі ў гульню “Казу вадзіць”. Бусел пагуляў у вясёлую беларускую гульню “Рэшата”. На працягу святочнага вечара ў зале панаваў добры настрой і атмасфера традыцыйнага святкавання Калядаў. Калі свята скончылася прысутныя рабілі фотаздымкі на памяць ў вясковым інтэр’еры.
Каляды ў госці да нас завіталі,
Здароў’я, бадзёрасці, шчасця жадалі
Зімовыя дзівосы мы будзем успамінаць,
Ды наступнага свята з несцярпеннем чакаць!